دلوقتي ساعات بقابل مشكلة بتواجهني وأكتشف إن فيه ناس كتير بتواجه نفس المشكلة ومن هنا بتبدأ فكرة مشروع أحاول من خلاله أحل المشكلة دي

بس غالبًا المشاريع اللي بفكر فيها بتكون أكبر من الـ Skills والمهارات التقنية اللي عندي حاليًا وده شيء كويس في حد ذاته لأن المفروض إن المشروع يعلمني حاجات جديدة ويقويني تقنيًا

مثال أنا كنت بحاول أقرأ Comics زي Marvel قبل ما أدخل حاسبات لكن كنت بواجه صعوبة في فهم بعض الحوارات والتعبيرات بسبب اللغة

ولما بصيت على مجتمع الكوميكس العربي لقيته ضعيف جدًا ومعتمد بشكل كبير على مجهود أفراد بيترجموا الكوميكس يدويًا. والموضوع بطيء جدًا ومفيش منصة حقيقية بتجمع الناس المهتمة بالمجال ده. أغلب الناس بتقرأ لوحدها بالإنجليزي ومفيش Community فعلي يجمعهم

فبدأت أفكر إني أعمل Tool تترجم الكوميكس تلقائيًا من الإنجليزي للعربي وفي نفس الوقت أبني منصة تجمع الكوميكس العربي بحيث الناس تقدر تقرأ أونلاين أو تحمل اللي هي عايزاه. يعني في النهاية يكون فيه مكان يجمع المهتمين بالمجال ويساعد على إحياء الـ Community العربي.

بدأت أبحث عن الموضوع ولقيت فعلًا Tools جاهزة بتعمل الكلام ده لكنها مدفوعة. فدخلت GitHub أدور على مشاريع Open Source ولقيت ناس بتنفذ نفس الفكرة باستخدام Local AI Models من خلال Pipeline فيها مراحل مختلفة زي Text Detection وبعدها OCR لاستخراج النصوص وبعدها الترجمة وإزالة النص القديم من الصورة وإضافة النص الجديد.

ولقيت إن فيه Models مفتوحة المصدر ممكن أستخدمها وبعضها متاح بصيغة ONNX وبيتعمله Inference باستخدام ONNX Runtime.

بس حسيت كده انى مش قد المشروع او الفكره دى

رغم إن الـ Workflow بقى واضح وإن فيه Models جاهزة ومفتوحة المصدر إلا إن فيه Concepts كتير جديدة عليا. مثلًا ONNX Runtime كان مفهوم جديد بالنسبة لي واضطريت أبحث عنه وأفهم هو إيه وبيعمل إيه وإزاي أستخدمه علشان أشغل الـ Models وأتعامل مع الـ Outputs بتاعتها

المشكلة إني لما ببص على المشروع ككل بحس إن فيه حاجات كتير جدًا لازم أتعلمها قبل ما أقدر أنفذ اللي في دماغي. وبلاقي نفسي مش عارف أبدأ منين ولا أعمل Structure للمشروع إزاي ولا إيه اللي المفروض أفهمه الأول وإيه اللي ممكن أتعلمه وأنا بنفذ

وساعات بدل ما أبدأ وأتعلم بالتدريج بلاقي نفسي دخلت في دوامة بحث وقراءة عن Technologies وConcepts جديدة وكل ما أفهم حاجة تظهرلي حاجات تانية مرتبطة بيها.

وده مش موقف خاص بالمشروع ده بس. أنا حاسس إن دي مشكلة ممكن تقابل أي حد عنده فكرة مشروع أكبر من خبرته الحالية

فالسؤال هنا إزاي أتعامل مع النوع ده من المشاريع؟ إزاي أخرج من حالة العجز دي وأبدأ أحول الفكرة لحاجة حقيقية من غير ما أفضل مستني لحد ما أكون فاهم كل حاجة؟

وطبعا حابب اوجه شكر خالص للبشمهندس مازن لانه من المشاريع اللى عملها مثلا زى جرافيكسى ده اللى خلانى اللى هو اركز فى المشاكل اللى بواجهها وانى افكر ازاى اوجد حل ليها