السلام عليكم ،

بما ان هنا المنصه لسا جديده ومفيش ناس كتير عليها ف انا اعتقد ان دا اكتر مكان ممكن اتكلم بحريه فيه واقدر اخد ردود مفيده خصوصا ان الناس كلها الي هنا تك وجايين من عند البشمهندس مازن ،

بدون اي مقدمات الموضوع الي عاوز اخد راي الناس فيه ببساطة هو ان انا شغال بقالي فتره كبيره في شركه معينه من الشركات الي بدأت الفتره الاخيره تبقا شركه نسبيا محترمه

الشركه دي اساسا كانت موجوده من ٢٠٢٠ وشغاله في العقارات والاستثمار وإدارة المشاريع بس صفت في ٢٠٢١ عشان صاحب الشركه انشغل واستثمر في مشاريع تانيه في المملكه والشركه حبه حبه بدأت تتراجع لمده ٨ شهور كاملين وجت على اخر ٢٠٢١ الشركه وقفت جميع انشطتها من توريدات وعقارات واستثمارات وإدارة مشاريع حتى المقر بتاعها قفلوة

لحد هنا انا مكنتش لسا اعرف اي حاجه عن الشركه دي ولا عمري سمعت عنها لانخراطي في مجال التك وان انا بعيد اصلا عن المجالات الي بتشتغل فيها الشركه ووقت ما الشركه قفلت كانت قيمتها تقدر حوالي ٤ مليون جنيه (على كلام مؤسسها ) المهم مرت الايام والشركه فضلت كام شهر قافله لحد ما بالصدفه البحته اتقابل مع صاحب الشركه دي لأول مره مع واحد صديق ليا كبير يعني زي اخ كبير هو الي مربيني وانا مكنتش اعرف ان الي قاعدين معاه دا اصلا صاحب شركه ولا مستثمر ولا رجل أعمال ولا اي حاجه الراجل حرفيا كنت اول مره اشوفه ف اتكلمنا وصديقي الكبير دا قاله خلي بالك زياد مهندس والراجل قعد يتفسر مني وشفت ساعتها في عنيه شغف كبير جدا لدخول المجال وكمان هو كان عنده بالفعل اكتر من بزنس شغالين وليهم websites وكدا ف الراجل كان عنده خلفيه خصوصا ان انا Full stack بس سر انجذاب الراجل للكلام معايا هو ان انا كنت دايما بدور على الاختلاف خصوصا ان انا داخل مجال البرمجه من وانا عندي ١٢ سنه حبا فيه مش عشان اشتغل اصلا وعمري في الفتره دي في حياتي م قدمت في شركه عامتا نرجع للموضوع هو الراجل شاف الشغل تقريبا كان أول مره يشوفه عندي عشان انا كنت شغال على مشاريع كتير مميزه فيها دمج 3D ب مكتبه اسمها threejs شغاله بحاجه اسمها webGL عشان تقدر ترسم اشكال 3d في الويب وتعدل الاضائات والمشاهد والكاميرا إلى آخره وكمان في الفتره دي في مطلعه ٢٠٢٣ كان لسا موضوع ال AI Agents والاوتوميشن لسا جديد ف انا كنت ملم بالكلام دا كلو وكنت عامل مشاريع Agents بتبيع في الويب سايت وبتقدر تاخد اكشنز زيها زي اليوزر بالظبط ف الراجل اقتنع جدا وبدأ الكلام يروح من التك إلى البزنس خصوصا ان انا معنديش خبره فيه وكدا المهم اتفقنا والراجل جميل جدا بصراحه واداني امتيازات كبيره جدا رغم ان انا سني صغير ودا هيسببلي مشاكل فيما بعد ..

المهم الشركه اشتغلت تاني والانشطه بدأت تشتغل وهو كان اصلا عنده خطه يشغل الكلام دا يعني هو مش عشاني هو اصلا كان عاوز يشتغل من اول وجديد ولكن هو بقا رخص النشاط الجديد بتاع ال IT ودفع فيه أرقام محترمه عشان ياخد التراخيص ونقدر اننا نشتغل برا مصر

الحمدلله الشغل يمشي ونبدأ نشتغل وفي خلال اول ٣ شهور بس إيرادات الشركه توصل ٦٥٠ الف جنيه من الإيرادات داخل وخارج مصر من علاقات ناس في السعوديه وناس في المانيا وشغل برضو داخلي ولكن أضعف بكتير من برا والدنيا مشيت والأمور كلها تمام وبدأنا ندخل في مجال السمارت هوم واليوم اوتوميشن وهذا الكلام ودي اعتقد هي النقله بتاعت الشركه لان المشاريع كانت بتوصل ساعات قيمتها ل ٢٠ و ٣٠ مليون جنيه في المشروع الواحد زي كمباوند مثلا او مجمع فيلات ذكي والأرقام بدأت تبقا خياليه

في الفتره دي كلها بفضل الله انا الي كنت مسؤل عن كل شيئ يخص البرمجه والتك والمشاريع وبصراحه انا في الفتره دي برضو تفكيري اتغير ١٨٠ درجه واتعلمت بزنس وازاي اقدر احول الأكواد إلى مشروع ناجح يقدر يخدم الناس ويطلع فلوس واتعلمت كمان شيئ اهم من كل دا ان الي بيفرق الشخص الناجح او المهندس الناجح عن غيره انه يقدر ازاي يحول التخيل إلى حقيقه ملموسه ومشروع حقيقي يجيب فلوس ويكون دخل وايرادات ثابته واتعلمت كتير جدا من الإدارة وخصوصا من صاحب الشركه الي كان دايما بيشرحلي اعمل اي ومعملش اي والحاجه ازاي تمشي صح رغم ان هو مكانش عنده أدنى خبره في المجال البرمجي ولا عمره درسه ولكن اداريا هو راجل عظيم

لحد هنا اعتقد ان الموضوع جميل وان الكلام مفيهوش حاجه غلط ولكن كان في حاجه بصراحه انا شايف ان هي كارثه او غلطه كبيره انا تجاهلتها ...

الشركه انهارده قيمتها التسويقية عدت ٣٠ مليون جنيه بالاعتماد شبه كلي على مجالات التك الي هي السمارت هوم وال AI والاوتوميشن والتطبيقات والكلام دا كلو الي المفروض انا الي ماسكه كلو تحت مسمى "CTO" ولكن مع الوقت بدأت تقابلني مسؤليات عشان انا في الفتره دي برضو سني كبر ودخلت جامعه وانا مع الناس دي من قبل الجامعه وانا داخل جامعه خاصه مش حكومي كمان ف المصاريف بدأت تكتر عليا وحرفيا من كل الفلوس الي بتدخل الشركه دي انا كان بيطلعلي مقارنتا بيها فتافيت يادوب كانت مصاريف ومصاريف الجامعه بتاعتي بالعافيه ولما حاولت اكتر من مره افتح ملف السمارت هوم المدير العام حرفيا بالنص يقولي :

دا شغل مقاولات انت ملكش غير اشتراك السيستم الي على ال Device الي البيت شغال عليه مع العلم ان انا الي مشغل القسمين في الشركه هارد وسوفت (IT) ووصل ان في مهندسين في الشركه تحتي بياخدوا مرتبات اعلى مني وانا عشان مش باخد مرتب وعقدي نسبه مش مرتب بقيت باخد اقل منهم بسبب التلاعب الي بيحصل والتكاليف الي انا بدفعها في المشاريع رغم ان هي المفروض على الشركه مش عليا انا ولكن انا بتحملها من نصيبي مهما كان حجمها ف بالتالي مبقدرش اخد مبالغ كويسه من المشاريع الي بتتنفذ

انا بصراحه في حيرة من امري

انا مش قادر أتراجع عن الشغل معاهم او اسيب الشركه عشان حرفيا انا الي بانيها من الصفر انا الي عملت الويب سايت ب ايدي حرفيا

وفي مشروع عاوز انفذه بصراحه برا مع مستثمرين تانيين وشركه تانيه ولكن فيه هبقا متقدر اكتر ولكن المشروع لسا مطلعش برودكشن ولسا منعرفش هينجح او لا ف انا متردد اسيب كل حاجه عشانه وابقا خسرت كل حاجه

ومتردد اشتغل هنا وهنا مقدرش اوفق او حتى لو وفقت معرفش صاحب الشركه الي حرفيا علمني كل حاجه وبالنسبالي الاب الروحي ليا اي هتكون ردة فعله ان انا سيبته بعد الفتره دي كلها وروحت اشتغلت مع منافسين ليه وانا كان بامكاني اشتغل المشروع دا داخل الشركه

انا في تردد كبير جدا ومش عاوز اخسر اي من الطرفين وبحاول على قد ما اقدر ان انا مكنش بدور فقط على مصلحتي ومبقاش نكرت الجميل

اسف اني طولت بس لو حد عنده نصيحه اتمنى يفيدني بيها