1 - لازم تتخلص من اى ضغط عندك و السبب انك بتبنى عقلية و لازم تستوعب كل كلمة عشان على اساسها هتبنى طريقة تفكيرك فى شغلك

2 - التواضع فى طلب العلم دى اهم نقطة و من غيرها هتعتبر ان الكلام بسيط و مش محتاج تطبقه عشان انت عبقرى و مش محتاج لكن الحقيقة لأ التطبيق لا يقل أهمية عن محتوى الكورس نفسه و مهما كانت المعلومة بسيطة لكن ليها أبعاد مش هتقدر تفهمها إلا لو بطلت تكابر و تواضعت و اعترفت انك جاهل و محتاج تتعلم بجد مش مجرد كلام

بعد ما تخلصت من ضغوط الحياة و حددت وقت تذاكر فيه الكورس و تواضعت في طلبك للعلم و قولت يا رب علمنى و انفعنى بما علمتنى نبدأ ساعتها فى طريقة المذاكرة نفسها

3 - حضرتك هتشوف الفيديو و كل معلومة تشرحها لنفسك و تكتبها على نوشن او اى برنامج ملاحظات و ده عشان حضرتك هتراجع عليها بعدين لمدة محترمة و ده اسمه التكرار المتباعد و عن تجربة بقولك هتدعيلى

4 - بعد ما لخصت ما تعلمته من كل فيديو و راجعته على فترات متباعدة متنساش أهم حاجة إنك تطبق على أفكار الدروس كلها لضمان انك مستوعب كل فكرة بأحسن شكل

5 - خليك فاكر ان مفيش كورس فى الدنيا هيكون كامل لإن الهدف منه هو الدخول للمجال فقط و ده معناه ان و انت بتكتب ملاحظاتك هتلاقى ان فيه حاجات محتاج تبحث عنها يعني مثلا IPO Model ده مجرد نموذج بسيط عشان تفهم ازاى الفكرة بتبدأ لحد ما تتحقق على ارض الواقع لكنه مش الوحيد و لكن ده مش معناه انك تسيب محتوى الكورس و تروح تاخد فكرة عن الباقى لأ خالص ولا حتى من باب العلم بالشيئ انما بعد ما تخلص الكورس و تتأكد انك فهمته تماما تبدأ تبحث فى الحاجات لى حددتها لنفسك و بكده هيكون عندك رؤية أوسع للأمور حتى بعد ما تخلص يبقى عندك roadmap جاهزة فى دماغك او فى نوشن على حسب انت اخترت ايه و تكمل عليها 

اخر حاجة حابب اقولك ان عنوان الموضوع مش حقيقي و دى مش أحسن طريقة و لكنها شغالة و لا تشغل بالك بغيرها و السلام عليكم