شفت كومنت جميل على فيديو ليا بيقول صاحبه: "أجد نفسي أكتب كود مكرر وبسيط فقط، وعندما أواجه شيئاً إبداعياً أو جديداً، أجد صعوبة في القيام به."

السؤال ده ممتاز، ليه؟ لأن ناس كتير بتحس الإحساس ده في الأول. وفاكرين إن الإبداع ده حاجة بتيجي من السما أو موهبة فطرية. وده مش صح خالص.

الإبداع في البرمجة مش إنك بترسم لوحة فنية مالهاش مثيل. الإبداع بييجي لما بتشوف وتتعلم من شغل ناس تانية تقيلة وعندها خبرة. بييجي من الـ "inspiration" (الإلهام) اللي بتاخده من غيرك.

طب أعمل إيه عشان أبقى مبدع وأكتب كود جامد؟

هي كلمة واحدة: ابني مشاريع.

بس مش أي مشاريع وخلاص.

الفكرة إنك تبدأ تبص على مشاريع موجودة بالفعل. خش على GitHub، أو أي موقع فيه Open Source projects، ودور على مشاريع ليها علاقة باللي بتتعلمه.

الخطوة الأولى: بص على الكود بتاع المشاريع دي. شوف الناس دي كاتبة الكود إزاي. إيه الـ Patterns اللي بيستخدموها؟ إيه طريقة تنظيمهم للكود؟ خد أفكار.

الخطوة الثانية: بعد ما تفهم مشروع معين أو جزء منه، حاول تبنيه أنت بنفسك من الصفر. بالظبط زي ما شفته.

الخطوة الثالثة (الأهم): بعد ما تبنيه مرة بنفس الطريقة، حاول تبنيه تاني بس بطريقة مختلفة، أو بتكنولوجيا تانية. المهم إنك توصل لنفس النتيجة النهائية أو نفس المتطلبات.

هنا بقى بيبدأ مخك يشتغل بجد!

كل ما تعمل مشاريع أكتر، وكل ما تبص على كود ناس تانية أكتر وأكتر، هتلاقي نفسك لوحدك بدأت تفهم الحاجات التقيلة والـ Advanced دي بتتعمل إزاي.

الأفكار هتبدأ تيجي لوحدها عشان تحسن الكود أو تحل مشكلة بطريقة أحسن.

الإبداع في التفاصيل الصغيرة دي، في طريقة الحل، في الـ Architecture بتاع الكود، في إنك تلاقي حل أذكى وأسرع.

ثق فيا، لو طبقت الكلام ده وبدأت تبني مشاريع بنفسك وتبص على كود الناس الخبرة، مستواك هيتحسن بشكل رهيب، وهتخرج بره دايرة الكود المكرر والبسيط دي تماماً.

ابدأ ومتكسلش. المستقبل ده بتاع اللي بيشتغل ويتعلم صح.

المجتمع الأكبر للعرب في مجال التك

1 رد