كو مصطلح راح تسمعه واي من تدخل عالم اختبار اختراق تطبيقات الويب، وخصوصاً بمجتمع Bug Bounty، راح تسمع جملة تتكرر بكل مكان: البرمجة مو مهمة، بس تعلم الأساسيات، الشبكات بس تعرف شوية عنها، الـ HTTP بس نظرة، الـ Linux مو شرط تتعمق... وكلشي بصيغة "بس الأساسيات".

بس إذا فكرت بيها شوي، وگعدت ويا نفسك، راح تكتشف إنو هذا الطريق معناه إنك جاي تبني بيت من غير أساس. حتى لو حصلت كم ثغرة بالبداية، وعيونك لمعت ويا أول مكافأة، راح توصل مرحلة تعجز بيها تكمل. راح تمل. راح تحس نفسك تايه. لأنك ما فاهم فعلياً شنو صار، شلون صار، وليش صار.

كلمة bug أصلها من حشرة دخلت بجهاز قديم وخلّت النظام يعلق. وهاي الكلمة بقت توصف كل خلل برمجي ناتج عن خطأ إنساني – خطأ من المبرمج.

فإذا الغلط برمجي، شلون تتوقع تگدر تلاگيه وانت أصلاً ما تعرف شنو الصح بالبرمجة؟ شلون تفسّر تصرف التطبيق، شلون تتابع request، شلون تفرق بين خطأ طبيعي وخطأ خطير؟

الـ bug عبارة عن نتيجة سلوك برمجي غير مقصود. السلوك هذا إجا من كود، من منطق، من استدعاء دوال، من نقص تحقق أو oversight بسيط. وكل هذا، تحتاج تفهمه حتى تگدر تمسك الخيط.

إذا تطورّت نفسك بالبرمجة، راح تشوف الـ XSS مو مجرد "script>alert('xss')</script>"، وإنما فهم للسياق، للـ DOM، للمعالجة الخلفية. الـ SQLi مو بس علامة اقتباس وخطأ، وإنما parsing، queries، filters. الفهم يخليك تفكر مثل المبرمج، ومن تفكر مثله، تگدر تتفوق عليه، وتشوف اللي هو غافل عنه.

الأساسيات نعم، هي الخطوة الأولى. بس مو كل الطريق. شيل فكرة "كافي بس الأساس"، وابدأ فعلاً تبني نفسك.

بالعالم الحقيقي، الي يدوّم مو الي يحفظ payload، وإنما الي يفهم ليش يشتغل، وليش ممكن باچر ما يشتغل، وشلون يعدل حتى يخترق من جديد.