بعتذر عن التأخير يهندسة، انا تقريبا انهيت حوالي 65% من ال MVP

المشروع انا فكرت فيه من منظور "حل لعدة مشاكل" منعاني منها انا وكل طالب بالجامعة عندي، انا بدرس بالجامعة الافتراضية SVU هندسة برمجيات، انا حاليا بنهاية السنة الثانية.
طول السنين الماضية لقيت الطلاب (وانا منهم) منعاني من مشكلتين اساسيتين:

ماعنا منصة تواصل رسمية او مجتمع النا كطلاب تخصصات تقنية ضمن الجامعة، وبسبب انو ماعنا تواصل فعلي على ارض الواقع، كان طول السنين الماضية كمنقذ طبيعي هية جروبات الواتساب والتيليجرام والفيسبوك يلي بتعملها الطلاب، مشكلة هاد النوع من التواصل هوة انو مو عملي اطلاقاً، مابعرف اذا عندكم بمصر نفس الشي، بس غالبا بينتهى فيك اليوم بحوالي 5000 رسالة (باكتر من جروب على مختلف المنصات) بنسبة 1% فائدة فعلية والباقي ميمز وكلام غير تقني وعشوائي، بالتالي الفائدة الفعلية ضايعة وماحدا عرفان راسه من رجليه.
بما انو 30% من علامة كل مادة بالكلية هية مشروع فصلي مشترك مابين 2-10 طلاب، فكنتيجة للمشكلة الاولى موضوع انك تشكل فريق وتجيب شركاء أشبه بالجحيم حرفيا.. فغالبا ما بتقضي ساعات عم تدور بعشرات او مئات من المجموعات على مواقع التواصل الاجتماعي لتبحث عن شركاء لمشروعك، الموضوع مشكل أزمة حرفياً.

وبما انو هدف مهندس البرمجيات يعمل سولوشن لمشكلة حقيقية بتواحهه هوة او مجتمعه او محيطه، لقيتها فرصتي لأصنع منصة Society(الاسم مبدئي قابل للتغيير)، المنصة هية عبارة عن مجتمع رقمي لطلاب التخصصات التقنية بالجامعة تبعي، بتساعدنا مشان نكسر العزلة الرقمية يلي عايشين فيها و نتعاون مع بعض وتحل مشكلة تشكيل الفرق وتبادل المعرفة والخبرات بشكل منظم بعيداً عن الفوضى يلي عم تصير.

المنصة فيها نظامين لحد الآن:

نظام المجتمع: وفيه فيك تنشر منشور او مقال تحت كاتيجوري معينة(معلومة-استفسار- برمجة- استفسار عن الجامعة- نقاش عام..) ، تعمل تعليقات، ردود، تناقش الطلاب ونتعلم من بعضنا البعض بشكل ممنهج ومضبوط.
نظام الشركاء: وفيه فيك تنشر طلب لتشكيل تيم لمشروعك الي عند ياه مثلا هاد الفصل ( وليكن مشروع مادة Programming II) وبتحط انت بأي كلاس وعند أي دكتور واذافي وصف معين بدك ياه( مثلا بدك حدا تبع فرونت وانت باك) والعدد ، والطلاب يلي عندهم نفس المعيار بيدخلو معك بالتيم بشكل منظم، وانت بتكون بصفة مؤسس او ادمن يعني لانك انشئت الفريق.

المشروع لسا ناقصو اشعارات وكاش بالباكند وادارة محتوى وشوية قصص تانية لسا شغال عليها لحد الان، هوة ضخم عليي كوني سنة ثانية، بس حبيت اخدو تحدي كوني تعبت على حالي خلال السنة ونص الماضية.

التكنولوجي يلي استخدمتها هية بالباك اند:
ASP.NET Core Web API
Entity Framework Core & LINQ

داتابيز
SQL Server
وكاش Redis

باركتيكتشر ال
Clean Architecture (Domain-Application-Infrastructure-Presentation)

مع RESTful API

وفرونت اند
React.js ب JavaScript

انا عامل ريبو عام مشان حطه بالسي في (كان المشروع ببدايته) اذا بتحب تعمل نظرة على المشروع الرابط:

https://github.com/MuaazHbobati/Society

بال README في تفاصيل اكتر، وصور للمنصة، بس الفكرة انها افضل بكتير حاليا

ياريت تعطيني رايك يهندسة ، انا طولت عليك اعذرني بس بحب اتناقش مع ناس قيمتها عالية
انا بحترم جهدك الي حطيتو ببناء مشروعك الخاص فيك جدا، وبحترم التفكير بالبزنس يلي ناس قليلة بتفكر فيه

ارفقتلك صور للمنصة حاليا

المجتمع الأكبر للعرب في مجال التك

(yasse386393)

السوشيال ميديا

أحدث المقالات